facebook

ކަނޑުމެދުގައި އޮންނަ ޖަޒީރާއެއްގައި އުޅެމުން އައި ދެމަފިރިއެކެވެ. މި ދެމަފިރިންގެ ތެރެއިން އަނބިމީހާގެ ކަމަކީ އަބަދުވެސް ކޮންމެވެސް ކަމަކާ ޝަކުވާކުރުމެވެ. އެއްބައިފަހަރު އަތްމަތި ދަތިކަމުންނެވެ. އަނެއްބައިފަހަރު އުޅޭ ގެގަނޑު ކުޑަކަމުންންނެވެ. އަނބިމީހާގެ ޝަކުވާތައް އަޑުއަހާ ކޮންމެ ފަހަރަކު ފިރިމީހާ ބުނެއެވެ. "ޝަކުވާނުކޮށް ކެތްކޮށްލާށެވެ. އިރާދަކުރެއްވިއްޔާ ކޮންމެވެސް ދުވަހަކުން ކޮންމެވެސް ހެޔޮގޮތެއް ވާނެއެވެ."

   އެއްދުވަހަކު އެހެން ސަހަރަކުން ސައްޔާޙަކު އެރަށަށް އަތުވެއްޖެއެވެ. މި މީހަކު ފެނުމުން ފިރިހެން މީހާ މި ސައްޔާޙު ގޮވައިގެން ގެއަށް އަތުވެއްޖެއެވެ. އެހެން ސަހަރެއްގެ މީހެއްކަމަށްވުމާއެކު އޭނާ ވާހަކަދައްކާ ބަހުރުވައެއްވެސް މި ދެމަފިރިންނަކަށް ނޭގެއެވެ. މިތަން ފެނިގެން އަންމީހާ ހިތްހަމަނުޖެހިގެން ކުދިކިޔަން ފެށުމުން ފިރިކަލޭގެ ބުންޏެވެ. "އެއީ އަހަރެމެނަގެ މެހްމާނެކެވެ. އޭނާ މިގޭގައި ހުންނަ ހުރިހާދުވަހަކު ވެވުނު އެންމެ ރަގަޅަކަށް ކަންތައްތައްކޮށްދޭންވާނެއެވެ."

               ފިރިމީހާ މިހެން ބުނުމުން އަނބިކަލޭގެ މި ސައްޔާޙަށް ވަރަށް ރަގަޅަށް ކަންތައްތައް ކޮށްދޭން ފަށާފިއެވެ. ނަމަވެސް ސައްޔާހުގެ ފަރާތުން އެއްވެސް އެއްޗެއް ނުލިބޭތީވެ ހުންނަނީ ވަރަށް ހިތްހަމަނުޖެހިފައެވެ. ފިރިކަލޭގެވެސް މެހްމާނަކަށް ކަންތައްތައް ބަހައްޓާންވީ އެންމެ ރަގަޅަކަށް ކަންތައްތައް ބަހައްޓަމުން އައެވެ.

               މި ސައްޔާހަކު މި ރަށުގައި ވަރަށް ގިނަ ދުވަސް ހޭދަކުރިކަމަށްވެއެވެ. ކޮންމެ ދުވަހަކުވެސް ހަން ދަބަހަކަށް މީނާ ގެންގުޅޭ ލިއެކިއުންތައް އަޅައިގެން ގެއިން ނުކުންނާނެއެވެ. ދެން ރަށުތެރޭ އިރުއޮއްސޭދެން އުޅުމަށްފަހު އެނބުރި ގެއަށް އަންނާނީ އަނދިރިވުމުންނެވެ. ބައެއްފަހަރު ރޭގަނޑު އޭނާ ލިއެކިއުމުގެ މަސައްކަތްކުރާތީ ފިރިކަލޭގެ މި މެހްމާނަށް އަލިގަދަ ވޮށެއް ދިއްލާދޭނެއެވެ.

               ދުވަސްގަނޑެއްވުމަށްފަހު މި ސައްޔާހު ފުރާދުވަސް އަތުވެއްޖެއެވެ. ދެން މި ދެމަފިރިންގެ ކިބައިން ހުއްދައަށް އެދިގެން އޭނާގެ ރަށަށް ދާންއޮތް ވިޔަފާރި ނަވަކަށް އަރައިގެން އެރަށުން ފުރާގެން ހިގައްޖެއެވެ. ސައްޔާހު ފުރައިގެން ދިޔަފަހުން އޭނާ ދިޔައީތީވެ އަނބިކަލޭގެ ވަރަށް އުފާކުރިއެވެ. ދެން އެއްދުވަހެއްގައި ގޭތެރެ ސާފުކުރަން އުޅެނިކޮށް ސައްޔާހު ގެންގުޅުނު ހަންދަބަސް ހަނދާންނެތިގެން ބާއްވާފައި އޮއްވާ ފެނިއްޖެއެވެ. އެއީ އެ ރަށުގައި ހުރި ހުރިހައި ދުވަހަކު އޭނާ ކޮށްފައިވާ މަސައްކަތެވެ. މި އަތްދަބަސް ފެނުމުން ފިރިކަލޭގެ މީތި ފޮރުވާފިއެވެ. އެކަމާ ނުރުހިގެން އަނބިކަލޭގެ ބުނެފިއެވެ. "ތީ ދެން ކިއެއް ކުރާނެ އެއްޗެއްހެއްޔެވެ. އަހަރެމެންނަށް އެގޭ އިބާރާތަކުން ލިއެފައިވާ އެއްޗެއްވެސް ނޫނެވެ. ތި ރަގަޅުވާނީ އެއްލާލިއްޔާއެވެ."

                  ފިރިކަލޭގެ ވިސްނާލާފައި ބުންޏެވެ. "މިއީ އޭނާ ވަރަށް ގިނަ ދުވަހުން ކޮށްފައިވާ މަސައްކަތެކެވެ. މި އަހަރެމެންނަށް ކިއަން ނޭގުނުނަމަވެސް މީގައި އަގެއްހުރުމަކީ އެކަށިގެންވާ ކަމެކެވެ. އެހެންވީމާ މި ބަލާވެސް އޭނާ އެނބުރި އަތުވެދާނެއެވެ. އޭނާ އަންނަންދެން މި ފޮރުވާނީއެވެ."

                 ސައްޔާހު އެނބުރި އަންނާނެކަމަށް އެތައްދުވަހެއްވަންދެން އެ ހަންދަބަސް ފޮރުވާގެން ފިރިކަލޭގެ އުޅުނެވެ. އެންމެފަހުން އެއްދުވަހު ސައްޔާހު އުޅޭ ޝަހަރަށް ވިޔަފާރި ނަވެއް ދާ ޚަބަރު ލިބުމުން ސައްޔާހު ހޯދުމަށް އެ ޝަހަރަށް ދިއުމަށް ދަތުރުހަދައިގެން ގޮސް ނަވަށް އަރާފިއެވެ.

                 ދިގު ދަތުރަކަށްފަހު ފިރިކަލޭގެ އެބުނާ ޝަހަރަކާ ހިސާބަށް ހިގައްޖެއެވެ. ދެން އެކި މީސްމީހުން ކައިރީގައި އެގޮތް މިގޮތުން ސައްޔާޙުގެ ވާހަކަ އަހަމުން އައިސް ހައިބަ ބޮޑު ގަނޑުވަރެއް ކަހަލަ ގެއަކާ ހިސާބަށް އާދެވިއްޖެއެވެ. މި ގޭދޮށަށް އައިސް ސައްޔާޙުގެ ވާހަކަ އެހުމުން ގޭތެރެއިން މުސްކުޅި ފުރާގެ މީހެއް ނުކުމެގެން އަތުވެއްޖެއެވެ. މި މީހަކު އައުމުން ފިރިކަލޭގެ އެއްކަލަ ހަންދަބަސް މި މުސްކުޅި މީހާގެ އަތަށް ފޯރުވާލިއެވެ. މި މީހާ ދަބަހަށް ބަލާލުމަށްފަހު އޭގައި ހުރި ކަރުދާސްތައް ނަގާގެން ބަލަންފަށާފިއެވެ. އިރުކޮޅަކުން އޭގައި މާރީއްޗަށް ލިއެފައި އޮތް ކަރުދާހެއް ފެނުމުން ފިރިކަލޭގެ މުނަށް ބަލާލާފައި މަޑުކޮށްލުމަށް އަތުން އިޝާރާތްކޮށްލުމަށްފަހު މި މީހަކު އެތެރެއަށް ވަދެއްޖެއެވެ.

              ކުޑަ އިރުކޮޅަކުން އެއްކަލަ މުސްކުޅި މީހާ އެހެން މީހަކު ގޮވައިގެން އެބަ އާދެއެވެ. އޭނާއައީ އޭނާ ދައްކާ ވާހަކަ ތަރުޖަމާކުރާނެ މީހަކު ގޮވައިގެންނެވެ. ތަރުޖަމާނު މެދުވެރިކޮށް މުސްކުޅި މީހާ ބުންޏެވެ. "އަހަރެމެންގެ ސާހިބަކީ އެކި ތަންތަނަށް ދަތުރުކޮށްއުޅުނު ސައްޔާހެކެވެ. ރަސްގެފާނުގެ ވަރަށް ޚާއްޞަ ރަޙުމަތްތެރިއެކެވެ. އޭނާގެ އާޢިލާ މީހެއް ގާތްތިމާގެ މީހެއް ހުންނަކަމެއް އަހަރެމެންނަކަށް ނޭގެއެވެ. އެކަމަކު އެންމެ ފަހުން ކުރަން އުޅުނު ދަތުރަށް ތައްޔާރުވަމުން އަހަރެމެން ކައިރީގައި ބުނެފައިވަނީ އޭނާ އެ ދަތުރުގައި ދާނީ އޭނާގެ ގާތްތިމާގެ މީހުންގެ ގާތަށް ކަމަށެވެ. ދަތުރުގައި ގިނަ ދުވަސްތަކެއް އުޅުމަށްފަހު އެނބުރި އައި އިރު ހުރީ ވަރަށް ބޮޑަށް ބަލިވެފައެވެ. ބަލިއެނދުގައި އޮށޯންނަމުން އަހަރެމެންނަށް ވަޞިއްޔަތްކުރީ އޭނާގެ ގާތްތިމާގެ މީހުން އޭނާ ހޯދަން އަތުވެއްޖެނަމަ ގޯތިގެދޮރާއި ހުރިހައި މުދަލެއް އެ ބަޔަކުންނާ ޙަވާލުކުރުމަށެވެ. އޭނާގެ ގާތްތިމާގެ މީހުންގެ އަތުގައި އޭގެ ވަޞިއްޔަތުނާމާ އޮންނާނެކަމަށްވެސް ބުންޏެވެ. ތިގެނަ ހަންދަބަހުގައި އެ ލިއުން އެބަ އޮތެވެ. އޭނާގެ ދެން ހުރި ލިއުންތަކަކީ ރަސްގެފާނަށް ވެދުމަށްއަރުވަންހުރި ލިއުންތަކެކެވެ. އެ ތަކެއްޗަށް އެ ރަސްގެފާނު ވަރަށް ރަގަޅު އިނާމުދެއްވާނެއެވެ. މިހާރު މި ގެއާއި މުދަލުގެ ވެރިންނަކީ ތިޔައީއެވެ. އަހަރެމެންނަކީ މިހާރު ކަލޭމެންގެ ޚާދިމުންނެވެ."

                  މި ވާހަކަތައް އަހާފައި ފިރިކަލޭގެ ވަރަށް އުފަލުން ސައްޔާޙުގެ ބޮޑު ގޯއްޗާއި ހުރިހައި މުދާ ޤަބޫލުކޮށްފިއެވެ. އަދި އޭނާގެ އަނބިމީހާ ގެނައުމަށް އަވަހަށް ދަތުރުތައްޔާރުކޮށްފިއެވެ. އެ ދުވަހު އެ ހުރިހައި ލިއެކިއުމަކީ ބޭކާރު އެއްޗެއްކަމަށް ބަލާފައި އުކާލިނަމަ މިއަދު މި ބޮޑު ގޯއްޗާއި މުދާތަކެއް އެމީހުންނަކަށް ނުލިބުނީހެވެ. ސައްޔާޙަށް ވަރަށް ބޭނުންތެރި އެއްޗެއްކަމަށް ބަލާފައި އެތަކެތި އޭނާ ރައްކާކުރީއެވެ. އެންމެފަހުން އަނެކުންނަށް ބޭނުންވާ އެއްޗެތި ރައްކާތެރިކުރުމުން އާޚިރުގައި ހުރިހައި މޮޅެއް މި ލިބުނީ އެމީހުންނަށެވެ.